1

2

Índiz Presentación Introducción Clasificación descriptiva 1) Instrumentos solistes:

i) Gaita ii) Acordión iii) Vigulín iv) Zanfoña v) Bandurria vi) Clarinete vii) Xipla viii) Flautes traveseres ix) Gaita de Sigüencu x) Pitu Cabreru xi) Trompa xii) Arpa

2) Instrumentos d’acompañamientu rítmicu: i) Familia de la Pandereta:

(a) Pandereta (b) Panderu (c) Pandoriu (d) Vanu

ii) Familia del Tambor: (a) Tambor (b) Redoblante (c) Tamboril

(d) Bombu iii) Familia de les Castañueles:

(a) Castañueles (b) Pitos (c) Tarrañueles

iv) Instrumentos adaptaos (a) Cuyares (b) Palos (c) Fierros (d) Payel.la (e) Botella (f) Lates (Aceite, Pimentón)

3) Otros instrumentos: i) Xuguetes musicales:

(a) Xiblates (b) Vigulín de Maíz (c) Cuernos y Bígares (d) Berrones y Cornetes

ii) Instrumentos que nun xeneren melodía o ritmu

(a) Rana (b) Carraca (c) Matraca (d) Riquerraque

4) Cantares 5) Biografía y Webgrafía:

Vo facer una bandurria, d'un troncu de cerezal,

El restriellu ye de texu, el caballu de nozal,

El pelleyu d'un corderu, los tornos de recimal,

Les cuerdes son de pitina, el rabil ye de peral

Vo cortar el rau a la yegua, pa prepara-y el sedal

Y cantar nes velaes, pa que me den de cenar.

3

Presentación Dende va sieglos, la música ta presente nos nuestros llabores y festividaes, creando un universu propiu

qu'anguaño supón una de les mayores traces d'identidá d’Asturies. Como en tantos llugares, la nuestra música

siempre dependió de les posibilidaes de les que se dispón en cada momentu. Delles veces, solo cuntamos cola

nuestra voz, a la qu'acompañamos coles manes, o los pies; otres veces cuntamos con instrumentos verdaderos; y

delles veces, nun tenemos más remediu qu'usar ferramientes y oxetos cotidianos que se puen usar como

instrumentos. Durante sieglos, construyimos los nuestros instrumentos musicales en casa, con materiales vexetales

o animales, como les flautes de cañavera, el panderu o'l pitu cabreru. Tamién usemos y usamos otros oxetos de la

redolada, como la ferramienta de llabranza, o los instrumentos de la cocina, como la payel.la, el vanu, la botella

d'anís; y tamién s’importaron otros instrumentos, delles veces conocíos como instrumentos cultos, que provienen de

les modes propies de cada dómina, como'l violín, l'acordión o'l clarinete.

Pue que la gaita y el tambor sían los instrumentos musicales más representativos d'Asturies, pero esisten

otros munchos que tienen una importancia grande na nuestra hestoria musical y tenemos de reconocer el llugar

importante que-yos correspuende. Amás, tampoco tenemos de confundir los instrumentos autóctonos colos

tradicionales. Munchos de los nuestros instrumentos tradicionales son verdaderamente autóctonos, pero otres

veces atopamos instrumentos que quedaron simplemente xuníos a una zona pequeña y non por ello son autóctonos.

Los instrumentos tradicionales, de los que mos vamos ocupar nesti trabayu, básense na so mayor aceptación, el so

espardimientu, na so evolución o nel so repertoriu, lo que los fai formar parte de la nuestra tradición. Cada pueblu

determina los sos gustos, establez el valor social de los sos instrumentos y failos propios, pasando a ser parte de la

so tradición.

Dende El Ventolín esperamos qu'esti trabayu curtiu de divulgación pueda dar a conocer un poco más el

catálogu ampliu d’instrumentos musicales de nueso que, sieglu tres sieglu, vieno componiendo y dando forma a la

música tradicional asturiana.

Grupu Folclóricu y d’Investigación El Ventolín

XXXVIII Selmana del Folclor Astur

4

Introducción Munches son les descripciones y clasificaciones feches de los distintos instrumentos de la tradición asturiana. Ye frecuente atopase cola clásica división de los instrumentos en tres families: vientu, cuerda y percusión. Esti sistema, anque bien aceptáu, ye poco precisu, y asina, por exemplu, inclúinse en percusión tanto los instrumentos puramente percutíos como cualesquier otru que simplemente nun sía de cuerda nin de vientu. Eugenio Martínez Zamora nel so llibru tituláu Instrumentos musicales na tradición asturiana, publicáu en 1989, propónmos una clasificación de los instrumentos tradicionales n'Asturies basada na de los musicólogos Erich M. Von Hornbostel y Curt Sachs, que propunxeron una clasificación muncho más lóxica que pretendía englobar a tolos instrumentos esistentes. Esta clasificación ye muncho más precisa, yá que tien en cuenta los principios acústicos que faen que suenen los distintos instrumentos. Asina, establécense cuatro grandes clases d’instrumentos musicales, qu’a so vez se dividen en grupos y subgrupos:

• Aerófonos : utilicen l'aire como fonte de soníu. • Cordófonos : el soníu produzse per mediu d’una o delles cuerdes en tensión. • Idiófonos : tán formaos por materiales naturalmente sonoros. • Membranófonos: producen soníu per mediu d’una o más membranes tendíes sobre les sos abertures

correspondientes. Esta clasificación siguiéronla llargamente distintos autores n’Asturies pero delles veces resulta demasiao técnica y complexa, lo que fixo qu'esti mesmu autor propunxera una clasificación nueva más cenciella, basada na mera descripción y l’usu de los instrumentos, y que ye la que vamos siguir nesti trabayu pa facilitar la so comprensión. Asina, presentámosvos los instrumentos tradicionales asturianos acordies col esquema descriptivu siguiente: 1. Instrumentos solistes. 2. Instrumentos d'acompañamientu rítmicu. i. Familia de la Pandereta. ii. Familia del Tambor. iii. Familia de les Castañueles. iv. Instrumentos adaptaos. 3. Otros instrumentos. i. Xuguetes musicales. ii. Instrumentos que nun xeneren melodía o ritmu.

Clasificación descriptiva

Instrumentos solistes: Entendemos por instrumentos solistes aquellos que producen una melodía y qu'amás tienen cierta entidá musical.

La gaita1 Eugenio Martínez Zamora afirma que se conoz yá dende la Edá Media, anque nun s'implantó firmemente hasta los sieglos XVII y XVIII, dómina de la que se caltienen numberosos archivos parroquiales y datos estadísticos como los recoyíos nel Catastru d’Ensenada, onde se reflexa la profesionalización del gaiteru, que delles veces podía vivir de los sos ingresos como músicu. El términu “gaita” ye'l más habitual pa referise a esti instrumentu anque en conceyos como Ponga, Parres o Cangues d’Onis conozse como “Gaita de H.uelle” o “Gaita Ribera”. Alfonso Fernández García, nel capítulu Orixe y evolución de la gaita asturiana, dientro del llibru Gaita

1 Ilustraciones procedentes del llibru La Gaita Asturiana, Método para su aprendizaje. Servicio de publicaciones del Principado de

Asturias, 1991.

5

Asturiana, afirma que la so presencia ta documentada n'Asturies dende el s. XIII y qu’a partir d’ehí, foi evolucionando hasta'l sieglu XIX onde algama un formatu más o menos estándar que va permanecer ensin apenes variaciones significatives hasta los años ochenta del sieglu XX. Dende entós, produzse un saltu significativu de calidá y profesionalidá que dio llugar al instrumentu que conocemos anguaño. Esti mesmu autor describe la gaita como “un aerófonu provistu d'un bordón baxu dividíu en tres secciones estensibles, de les que la postrera remata en copa o resonador buecu; un fuelle de piel enterizo de cabritu, ensin cordures y curtío por procedimientos naturales; un sistema bucal d'alimentación del fuelle, a traviés d’un tubu provistu de válvula pa torgar el retrocesu del aire. El punteru tien una estensión d'octava y media, ta provistu de trés troneres, dos llaterales y una posterior, y afínase en distintes tonalidaes que van del re al si natural, siendo la más común en do.” Esti modelu de gaita espárdese per toa Asturies, dende los conceyos orientales, inclusive nos conceyos vecinos de Cantabria, hasta'l centru occidente y escontra’l norte de Lleón. Dende aproximao'l ríu Navia, y algamando delles contornes de Lugo, esistió un tipu de gaita, marcadamente diatónica, qu'almitía indistintamente escales semicerraes o abiertes y distintos tipos de llingüetes. Más tarde, a lo llargo del sieglu XX, asolápase colos instrumentos d'aquella comunidá. No que se refier al so orixen, hai quien determina como primer fecha histórica'l capitel de la Ilesia de Santa María de la Oliva de Villaviciosa, del sieglu XIII, anque esti datu punxéronlu en dulda autores como Luis Argüelles. Tamién hai quien cita un canecillu asitiáu nes ruines de la Ilesia de San Pedro de Plecín, Peñamellera, sieglu XII, anque'l deterioru de la escultura ye tal, que nun dexa determinar con exactitú que se trate d'una gaita. Otros autores daten l'orixe de la gaita nuna dómina anterior a la romanización basándose na descripción d’Estrabón, que nel volume III de la so Xeografía, dedicáu a Hispania, describe asina los usos musicales de los pueblos qu'habiten al norte del ríu Dourios (Douru):

“Mientres beben, dancien los homes al son del aulos y la salpinx, saltando n'alto y cayendo en xenuflexón”

Daniel García de la Cuesta, nel so llibru Les gaites destaca una imaxe de finales del sieglu XII n'ábside de la ilesia románica de San Jorge de Mazaneda, nel conceyu de Gozón que quiciabes pudiera ser la representación más antigua d'una gaita na Península Ibérica. Ente los documentos escritos destaca'l qu'apaez nel Llibru d'Alcuerdos d'Uviéu, el 10 de Xunu de 1573, onde podemos lleer:

"Acordóse que salgan los instrumentos de gaitas, atabales y música a dar las alboradas como lo han hecho siempre y se les pague su trabajo..."

Tamién son bien destacables les investigaciones de la profesora Yayoi Kawamura que señala dos documentos bien singulares, el primeru d'ellos nel Llibru d'Alcuerdos del Archivu Municipal d'Uviéu, de 1673, onde se fai referencia a Juan Ribera, danzante:

"...Él y dicho su hijo abían de poner ocho personas y un gaytero para la dança del Corpus y su octabario...".

"otro grupo de danzas, medio mes antes del Corpus, Juan del Valle, Domingo del Valle, danzantes y Domingo Martínez gaitero de Gijón, ofrecieron sus servicios para la danza de los zapateros."

A partir d'equí queden bien pocos datos hasta bien entráu'l sieglu XIX, onde yá algamen una gran reconocencia gaiteros como Aladino'l d'Amandi o'l Gaiteru Llibardon. Esti postreru participó na Esposición Universal de París en 1889 representando a España nel so pabellón, y más tarde grabó en Milán el primer discu de Gaita Asturiana conocíu. Entráu'l sieglu XX, y cola llegada de los conflictos bélicos yá conocíos, la gaita tamién pierde puxu, anque nesta dómina destaquen sobremanera el gaiteru José Remis Ovalle, Gaiteru Mayor d'España, o'l Gaiteru Veriña. Esto nun quier dicir que dexara d'haber gaiteros, sinón que qu'había pocos de sonadía. Fonsu Fernández, director del Muséu de la Gaita de Xixón, diz n'ún de los sos estudios que, na zona de Ribeseya a Cantabria, contabilícense d'unu a dos gaiteros per pueblu, siendo ésta la zona onde menos espardida taba la gaita en toa Asturies. Ye dende los años 80 cuando entama la renacencia de la gaita n’Asturies, dando empiezu a una etapa de gran esplendor y modernidá de la mano de gaiteros como Xuacu Amieva, Manolo Quirós o Pedro Pangua, por mentar dalgunos. Apaecen les bandes de gaites, introduzse'l solféu nel aprendizaxe, apaecen métodos d'aprendizaxe y los grupos folk, que fixeron de la gaita'l referente central de la nuestra música tradicional. Anguaño, la evolución de la gaita y los sos componentes ye un fechu destacable. Trabáyase en consiguir meyor afinación nes payueles, desarrolláronse punteros d'ensayu electrónicos, fixéronse prototipos

6

como la gaita MIDI en 1998, de la mano de José Angel Hevia, o les evoluciones recién feches en gaites cromátiques, de la mano d'Alberto Varillas o José M. Tejedor. Un fenómenu evolutivu enorme gracies a luthiers como Alberto Fernández, M. San José, Miguel A. Cachafeiro, Chus Solis, Vicente Prado, etc. que nun algamó al restu de instrumentos tradicionales. Tocante a la so morfoloxía, la gaita n’Asturies componse de:

• Fuelle: Bolsa fecha cola piel entero d'un corderu o cabritu o con otros materiales como'l Gore-Tex, que sirve como depósitu auxiliar d'aire.

• Soplete: Tubu pa introducir l'aire nel fuelle. Nel so estremu inferior ponse la válvula torna-aire. Nel estremu contrariu tien una boquiella d'aceru, marfilina o otros materiales.

• Punteru: Tubu melódicu con 8 furacos de dixitación y otros trés acústicos llamaos troneres. Nél amplifícase y modúlase’l soníu producíu pola payuela, formada por dos llámines de caña.

• Roncón: Tubu sonoru compuestu de trés pieces, prima, tercia y copa, qu'emite una nota d'acompañamientu, dos octaves per debaxo de la tónica del punteru. L'espigu que conecta la prima cola tercia sirve de corredera pa buscar l’afinación. Nel espigu de la prima qu'encaxa nel asientu va'l payón, que ye una llingüeta simple, de cañavera o plásticu.

• Ronquín: Roncón pequeñu compuestu de dos pieces, pero una octava percima d'ésti. • Asientos: Partes onde s'inxerten unes pieces con otres.

L’acordión Esti instrumentu apaez n’Asturies a finales del sieglu XIX y entamu del XX na so doble versión, acordión-pianu y el modelu de botones conocíu como “diatónicu”, qu'algama un espardimientu enforma mayor. Tamién se-y conoz polos nomes de “acurdión”, “cordión” o “acordión”. Según Martínez Zamora, paez que llega al traviés de los conceyos occidentales pela vía marítima y tamién al traviés de la provincia vecina de Lleón. Foi un instrumentu que s'asitió tol nuestru territoriu con una rapidez enorme al considerase un referente de “modernidá” y pola so adaptación fácil a los ritmos de la dómina y a los bailles a lo suelto. L’Acordión ye un instrumentu polifónicu de botones qu'emite

7

los soníos pola presión sobre unes llingüetes llibres, sistema que yá conocíen chinos 3000 años a.C. Sicasí, ye a principios del s.XIX cuando Eschembach creó'l Eoline, alliniando nuna placa una serie de llingüetes afinaes que formaben una escala. L’instrumentu siguió evolucionando hasta 1829, añu nel que'l fabricante d'órganos y pianos, Cyrill Demian, patenta'l Akkordion, en collaboración colos sos fíos Carlo y Guido. Esti primer acordión yera una caxa que contenía cinco llingüetes y un fuelle fácil de manexar. Solo presentaba cinco botones que producíen dos acordes distintos, unu al abrir el fuelle y otru al zarralu. L'ésitu foi tal que nel añu 1831 yá yera posible atopar métodos p'aprender a tocar. La llegada a Asturies retrásase hasta finales del sieglu XIX, como yá diximos posiblemente al traviés del suroccidente, onde se recoyeron testimonios del so usu en Zarréu sobre l'añu 1915. Aurelio de Llano describe nuna de les sos obres, cómo nel occidente contrataben maestros que veníen en grupos de L.laciana y otros llugares de Babia, trayendo munchos d'ellos un acordión col qu’animaben bailles y fiestes. Eugenio Martínez Zamora afirma que non solo foi bien importante nesa zona d’Asturies, y cita instrumentistes bien conocíos como l'acordionista conocíu como "El Francés", qu’animaba fiestes en Llames de Parres, localidá próxima a la zona oriental. Tamién cita al bisagüelu de Josefa Miyares, de Llerices (Cuadonga), que baillaba al son del acordión allá pel añu 1.850, ente otros exemplos.

El violín El violín o vigulín, como recueye'l Diccionariu Xeneral de la Llingua Asturiana, foi ún de los instrumentos más espardíos na nuestra tierra a finales del sieglu XIX y principios del sieglu XX, tanto ente la sociedá culta como nel folclore popular. Daniel García de la Cuesta afirma qu'apaez n'Asturies escontra l'añu 1550, anque yá había con anterioridá instrumentos de forma asemeyada y de música similar. Nel añu 1702 atopamos la primer referencia al instrumentu, al citase’l so usu na orquesta de la catedral d'Uviéu dende onde s’espardió per romeríes y fiestes populares. Según esti mesmu autor, compónse d'una caxa de resonancia d'unes diez pieces, a la que se xunten otres pieces más pequeñes pa que cola presión de les cuerdes nun se “desfaiga” l’instrumentu. Nes versiones más antigües d'entamos del sieglu XVI cuntaba con cuatro cuerdes, la tapa taba llixeramente curvada y la ponte más elevada. La so evolución foi constante a lo llargo del XVII y XVIII hasta quedar coles característiques que tien anguaño. El Vigulín foi bien habitual ente los probes méndigos que los tocaben nos mercaos y en romeríes, al pie d’un tambor o un bombu que marcaba'l ritmu. Martínez Zamora describe dos tipos de violinistes: los ambulantes que de normal tocaben cantares d'usu indetermináu o coples, y los locales, qu'usaben el vigulín como l’instrumentu solista de los bailles a lo suelto. Nomes de violinistes famosos asturianos fueron “El ciegu de Margolles”, “El ciegu de Quinciana”, “El ciegu de Vixande”, “El ciegu de Madiedo”, “Xuan d’Andrín”, "Sarasate” de Bode, Benitu y el so fíu Mento, o El ciegu de Pandiellu” que tocaba l'acordión, el violín y la gaita. La so popularidá foi tal que tamién se caltienen munchos testimonios, grabaos y fotografíes nos qu'apaecen personaxes con vigulín, como'l perconocíu de "La ciega de Baraya".

La zanfoña Teresa Álvarez Acero descríbelu como “un instrumentu musical de cuerda estregada que se toca faciendo dar vueltes a una rueda per aciu d’un rabil. Esta rueda ta incrustada na caxa y sobre ella asítiense les tecles, que, gracies a un mecanismu de pieces de madera denominaes espadielles, pulsen les cuerdes en distintos llugares, acurtiándose o allargándose la vibración de les cuerdes y produciéndose distintes melodíes. Les otres cuerdes que nun tienen contactu col tecláu, realicen un

8

soníu continuu como base.” Trátase d'un instrumentu complexu que yá nos sos principios se componía d'un total de 250 pieces. Popularmente conozse polos nomes de zanfoña, zanfueña, zanfonía, zamploña o gaita de rabil. Esti instrumentu ye una evolución del organistrum, bien estendíu ente los sieglos X y XI nos monasterios, p'acompañar el cantar de los monxos. A partir del sieglu XIII evolucionó notablemente y atravesó una dómina de decadencia notable que duró hasta'l sieglu XVIII, dómina na que se convierte nel instrumentu de moda de la corte francesa, lo que traxo consigo un perfeccionamientu notable tanto nel aspeutu físicu como técnicu. Nun s'atopen referencies n'Asturies hasta l'añu 1784, nun testu de Francisco Díaz Pedregal, nel que se describen los festexos que se fixeron n'Uviéu pa celebrar la nacencia de los fíos del rei:

"Destinóse el día 29 de Diciembre de 83 para dar principio a la primera iluminación, y a las doce de este día, con un general repique de Campanas tan acorde que parecían unísonas, rompieron sus voces los Tambores, Clarines, Pífanos, Gaytas y Sinfonías, que aun tiempo en gran numero con repetidas salvas de fusilería, fueron paseando las Calles principales" (…) "En las Casas de Ayuntamiento, se colocó toda la música de Capilla. Y en otros parages para alternar sus pausas, se puso otra no menos agradable a los genios del país, de Gaytas y Sinfonías, sin que faltase para los espíritus marciales, el pavoroso estruendo de clarines, Caxas, y otros militares instrumentos; resultando de todo este conjunto, una admirable consonancia que animaba y suspendía los sentidos y continuó por las tres noches."

Xosefa Xovellanos, nos "Poemas a las Exequias de Carlos III", tamién menciona esti instrumentu:

Y al son de les chanfoníes, panderetes y panderos,

y otros munchos andromancies Hi fixieren rendimientu

Todo al son de munchos chiflos Zanfoníes y corñetos. Plasmarís si los oyeres

Como yo plasmé d'afechu; Porque dígote en verdá

Que toquidos como aquellos Nunca salieron de gaita

Nin los conoz dengún ciegu.

Teodoro Cuesta nel poema "Barruntos d'amor" descríbelu asina: La xente sal de la iglesia

Formando corros na campa, Y al son d'una zanfonía Lixeru baile s'entama

Polvorientos y sudorosos Corcobien en la mudancia,

Y anque l'astru enciende yesca Nengún de bailar se cansa. Pero, amigu, cansó'l ciegu...

Pa tocar, tien d'asitiase la zanfona en cuellu, suxetu a la cintura. La mano derecha xira'l rabil y colos deos de la manzorga prímese les tecles pa producir les melodíes. Famoses son tamién les representaciones gráfiques de zanfoneros como'l del grabáu de Cueves, el cuadru de Juan Menéndez Pidal "Guiñol na aldega", la semeya de la Colección Cué na qu'apaecen un ciegu y el so llazarillu, y un grabáu de Llobet, "Danza Prima". Toes elles son prueba evidente de la importancia d'esti instrumentu na nuestra tradición qu'algama hasta 1947, añu nel que morrió Luciano Tarilonte, vecín de Beneros (Casu), qu’a lo llargo d’años percorrió l'altu Nalón animando les fiestes cola so zanfoña.

9

Anguaño, gracies a les escueles de música tradicional qu'esisten en toa Asturies, esti instrumentu entama una etapa nueva na historia de la nuestra música de la mano de músicos como Merce Santos, Héctor Braga, Daniel García de la Cuesta, Xuacu Amieva, o José Angel Llaneza, ente otros munchos.

La bandurria La bandurria ye un instrumentu procedente d'oriente que s'estendió per toa Europa de la mano de los pelegrinos camín de Santiago, anque hai tamién autores qu'atribúin a los árabes el so espardimientu. Esisten representaciones que se remonten al sieglu XI, principalmente en canecillos y en códices románicos. N'Asturies, el rabel conozse como bandurria, y ye qu'hai una diferencia fundamental ente dambos: el rabel apóyase nel costazu, mientres que la bandurria tócase ente les piernes. El so usu estendióse enforma nel oriente, en llugares como Piloña, Llanes o les Peñamelleres. Manuel. S. López afirma qu'anque namás hai constancia material de rabeles en Caliao (Casu), onde se dataron hasta venti instrumentistes a lo llargo del sieglu XX, tamién llegó información oral sobre la so esistencia en L.luarca, El Valle (Somiedu) y Bual, lo que mos fai pensar que foi un instrumentu qu'algamó tola nuestra xeografía. Daniel García de la Cuesta, autor de La bandurria y el rabel, describe mui gráficamente esti instrumentu: “tien forma d'ocho, con una caxa sobre la que s'atopen trés cuerdes feches de tripes de pita o corderu. Estes cuerdes tán suxetes pol restriellu na parte de baxo y pol claviyeru na parte de riba de la bandurria. El claviyeru ta formáu por un pelleyu de cabra o pergamín, pegáu a la caxa con unos tornos (clavos), anguaño chinchetes metáliques. El pelleyu suel tener trés o cuatro furacos que faciliten la salida del soníu. Nel centru de les cuerdes ta'l caballu que tresmite les vibraciones de les cuerdes al pelleyu”. Una parte bien llamativa de la bandurria ye la so parte posterior que suel tar adornada con talles de figures xeométriques y símbolos, remataes coles iniciales o’l nome del artesanu que la fabricó. L’arcu denominase rabil, una pieza de madera fecha a partir d’una rama y los guadeyos, normalmente de cola de caballu, ataos a los estremos del arcu. A finales del sieglu XVIII, Xosefa Xovellanos cita esti instrumentu na so descripción de les exequies del rei Carlos III:

Sofitados en na barba Unos bandurrios pequeños,

Al solmenayos les cuerdes Con arquinos de civiellu Chillaben que yera cosa

De perder un home el sesu. El repertoriu propiu d'esti instrumentu compónse de coples y versos picantes pa tocar alredor del llar, anque tamién yera común como acompañamientu de romances, cantares y tonaes. Bandurrieros como Xuacu Amieva, Daniel García Cuesta, Héctor Braga, ente otros, siguen la tradición d'instrumentistes como Cefero Travieses o David Caballín, pa qu’esti instrumentu permaneza vivu na nuestra tradición.

10

El clarinete Esti instrumentu apaez n’Asturies a finales del s. XIX, principalmente nel occidente, onde formaba parte de les famoses bandes compuestes de gaites, redoblante, bombu y clarinete. En delles ocasiones sustituyó a la gaita, lo que fixo posible la pervivencia de delles melodíes que d'otra manera desapaeceríen. El clarinete ye un instrumentu musical de la familia de vientu madera con una boquiella con caña simple que s'adquiría en mercaos y tiendes especializaes. El so antecedente directu yera conocíu como chalumeau y surdió en Francia. A diferencia del instrumentu actual, ésti solo cuntaba con 7 furacos pa crear el soníu. Foi nel sieglu XVII cuando Johann Christoph Denner, músicu d'orixe alemán, se les arregló pa tocar con una técnica novedosa, que se caracterizaba por tener una nota más aguda. Foi dende esti descubrimientu cuando'l clarinete pudo entamar a desarrollase, hasta llegar a lo que conocemos anguaño. Morfolóxicamente, el clarinete consta de les partes siguientes: Boquiella: ye la pieza onde va asitiada la caña y onde l'instrumentista asitia la boca pa realizar la embocadura. Barrilete: ye l'elementu qu'articula la boquiella col cuerpu superior del instrumentu. Cuerpu Superior: ye onde s'asitia la manzorga al tocar y tien parte del mecanismu del instrumentu. Cuerpu inferior: ye onde s'asitia la mandrecha al tocar y tien parte del mecanismu del instrumentu. Campana: Asitiada na parte inferior y cumple una función acústica que permite la proyección del soníu demientres s’executa.

La xipla N’Asturies denominase xipla a la flauta de trés furacos con embocadura de bisel. Los trés furacos atópense na parte inferior del tubu, dos na parte delantera y el terceru na trasera. La xipla gárrase faciendo pinza colos deos meñique y anular de la manzorga, apoyando tamién la embocadura nos llabios. Los deos corazón y índiz asítiense nos dos furacos delanteros, y el pulgar controla'l furacu posterior. Al empar, l'instrumentista lleva'l ritmu con un tambor usando la mano derecha. Nel suroccidente úsase pa interpretar la danza de palos anque'l repertoriu yera muncho más ampliu: xota, son d'arriba, muñeira, amás de pieces de más recién implantación como los pasudobles o les rumbes. El so orixe ye bien inciertu, pero foi bien popular na Edá Media y nel Renacimientu polo qu'apaez en munches representaciones, ente elles nes Cantigues d'Alfonso X. Nel casu d’Asturies, esiste una representación en Santa María de la Oliva en Villaviciosa del s.XIII. La popularidá d'esti tipu d’instrumentu fai qu'atopemos versiones asemeyaes en toa Europa y mui especialmente na península, con nomes como gaita charra en Salamanca, chifla o pito en Lleón, chiflo n'Aragón, txistu n'Euskadi o gaita rociera n'Huelva. El tipu de madera usao na so fabricación varía según les zones, anque les más habituales son l'uz, boxe, sabugu, nozal, encina y castañal.

Les flautes traveseres Construyíes en distintos tipos de madera, mayoritariamente sabugu y de un gran espardimientu en conceyos como'l de Bual, anque se llograron munchos datos sobre la so esistencia n'otros conceyos asturianos. Caracterícense por tener la embocadura nun estremu de la parte llonxitudinal del tubu, cerca d'ún de los estremos. La variedá de materiales y técniques d'ellaboración faen que tengamos d'estremar los siguientes tipos de flautes: Requintos y travieses

11

Son los exemplos más ellaboraos de flautes traveseres que conocemos n'Asturies y atópense sobremanera na zona más occidental, posiblemente por influencia de la vecina Galicia, onde son bien habituales. Fabríquense en delles pieces de madera, xuníes por espigos y reforzaes nes uniones con viroles, que suelen ser metáliques o de güesu. Presenten 6 furacos, asitiaos na parte delantera que se complementen con otra sección que contién la embocadura y un “tapón”, que facilita l’afinación. Delles flautes más evolucionaes lleven llaves. El Muséu de la Gaita de Xixón cunta con una bona selección d’instrumentos orixinales na so esposición permanente. Cañavera L'usu de la cañavera pa facer flautes traveseres espardióse muncho per tola nuestra xeografía, recibiendo el nome xenéricu de cañaveres o canaveiras. Tradicionalmente fabricábense arrémente pa emitir melodíes, polo que decidimos incluyiles nesta sección d’instrumentos solistes; a pesar de qu’otres versiones, con peor acabáu, yeren creaes pa neños y tendríen de ser consideraes xuguetes musicales. La propia naturaleza d'esti tipu de madera fai que’l so caltenimientu sía dificultosu y la costume yera que tenía de cortase pel iviernu y con lluna menguante, dexándola ensugar unos seis meses pa depués da-y forma a los furacos con un fierru caliente. Constantino Cabal describe la ellaboración asina: "(...) ábrese a lo llargo unos furacos, tapónase la parte de riba con un papel de fumar, y sóplase nel furacu más cercanu al papel. Mientres se constrúi hai que dicir:

-Salivín, salivar, sali, caña de pescar,

que mañana o otru día allá volverás a entrar...”

Nel conceyu de Bual a la trevesera fecha de caña conozse col nome de canaveira, y úsase p'acompañar una danza conocida como "La lluita". Otres flautes La cañavera nun ye l'únicu material col que se fabricaron flautes treveseres. Yera mui habitual la madera de sabugu polo fácil que resulta vaciar la parte interior, o'l güesu, d'orixe bien remotu. La de la imaxe pertenez a la colección del Muséu de la Gaita de Xixón, procedente d'El Pedrosu, n'Onís.

El pitu cabreru Trátase d'una flauta fecha de cuernu cónicu d'una cabra, mui habitual ente los pastores. Pa fabricalu solía enterrase unos díes o fervelu n'agua p'ablandiar el güesu que lleven dientro y poder sacalu con facilidá. Una vez vacíu per dientro, tallábase'l bisel y de siguío facíense los furacos pa llograr delles notes. Esteriormente pulíase pa dexalos llisos y brillosos. L'habilidá del pastor determinaba que se considerara un instrumentu musical real, si algamaba un bon soníu y taba bien afináu. Los pitos cabreros tán perbién documentaos nos montes eonaviegos del occidente, onde Eugenio M. recoyó otros nomes como panín, carambelu, o carambela. Esti mesmu autor afirma qu'hai rexistraes delles melodíes feches con esti instrumentu polo que decidimos incluílu nesta sección d’instrumentos solistes, ensin escaecer que lo normal yera'l so usu pa disfrute personal. Los pitos qu'apaecen na semeya tamién pertenecen a la colección del Muséu de la Gaita, procedentes de Gamonéu, Onís.

12

La gaita de Sigüencu Tamién se conoz como gaita de llingüeta, y describióla E. M. Torner nel so "Cancioneru de la Llírica Popular Asturiana", onde describe un instrumentu pastoril usáu na Sierra de Sigüencu, anque nun yera esclusivu d'esti llugar. Pa construyir esti instrumentu recúrrese, davezu, a un cachu de sabugu, al que se-y estrai'l interior, pa facer darréu dellos furacos a lo llargo del mesmu. N'ún de los estremos inxértase un xiblatu de caña y modúlase’l soníu colos furacos. Esti tipu de gaites nun se faen solamente de sabugu, pudiendo utilizase cañavera o un cachu de cualquier tipu de caña al que se-y pueda estrayer el so interior. Trátase de gaites cencielles, propies de neños, anque n'ocasiones l'habilidá del constructor daba llugar a instrumentos d'alta calidá y afinación.

La trompa La trompa, birimbáu o arpa de boca, ye básicamente un instrumentu d’usu personal que produz distintos soníos usando la boca como caxa de resonancia, llogrando asina producir distintes melodíes. El so usu ye eminentemente solista, polo que decidimos incluílu nesti grupu d’instrumentos. Ye mui habitual

n’Asturies, principalmente na zona occidental, a escepción de los conceyos costeros. Trátase d'un instrumentu cenciellu, tradicionalmente fechu por ferreros, compuestu d'una armadura metálica y una llingüeta. L'armadura tien forma más o menos esférica y la llingüeta, d'un metal muncho más finu y llargu, encaxa por presión en mediu la panza hasta sobresalir ente les dos llámines que formen el pescuezu. Pa tocar, suxétase cola manzorga pela parte ancha, asitiándola ente los dientes. El deu índiz de la mano derecha puntia la llingüeta, usando la boca como caxa de resonancia. Los llabios, mandíbules, llingua y farinxe modulen el soníu final. Delles veces la llingüeta podía terminar en forma de curva hacia alantre o hacia atrás pa facilitar el puntéu.

Munchos son los autores que consideren a la trompa un instrumentu musical en sí, anque'l so nivel de consideranza tea bien per debaxo d'otros instrumentos melódicos como la gaita o l'acordión, probablemente porque nunca sirvieron como acompañamientu pal baille y namás cumple'l papel de mera distracción. Sicasí, siempre se consideró y se recordó muncho a los bonos tañedores.

L’arpa Daniel García de la Cuesta, nel so llibru “Harpa y la so presencia n’Asturies”, fai una descripción bien detallada de la presencia d'esti instrumentu na nuestra tierra. Los datos más antiguos remóntense a una representación del sieglu XII, na ilesia de Santiago de Arllós, onde apaez una cabra tocando una arpa, y na ilesia de San Salvador de Fuentes, onde apaez representáu un burru tocando esti mesmu instrumentu. Tocante a los testimonios escritos, podemos remontamos al sieglu XVII, periodu nel que se caltienen datos de 18 arpistes de la orquesta de la catedral d'Uviéu, anque les referencies lliteraries nun apaecen hasta'l sieglu XIX, nes descripciones costumistes del autor Armando Palacio Valdés (1853-1938). García de la Cuesta diz que nel sieglu XVIII había n’Asturies decenes d’arpistes venceyaos principalmente a la lliturxa relixosa, anque tamién los había centraos nes representaciones teatrales populares. Nel sieglu XIX, l’arpa entra n’una época de declive que llega hasta la década de los 80 del sieglu XX, periodu nel que'l movimientu musical folk volvió a recuperar l'arpa pa melodíes tradicionales. Dende entós, el númberu d'intérpretes foi creciendo y tamién la so presencia en cursos, conciertos y grupos de música tradicional de too tipu.

13

Instrumentos de acompañamientu rítmicu: Xunto cola melodía siempre atopamos el ritmu, quiciabes muncho más antiguu que la primera, y n’Asturies fáilo en forma de munchos instrumentos que describimos a continuación:

Familia de la pandereta:

La pandereta La estructura básica d'una pandereta consiste nun aru de madera cubiertu por una piel nún de los llaos. El mesmu aru presenta unes perforaciones nes que s'incrusten unes sonajes o ruxideres nuna o dos fileres. El so tamañu varia indistintamente, anque les de la zona occidental suelen ser más grandes. Tala simplicidá y la escasez de gaiteros o otros músicos solistes, amás de la so fácil combinación cola voz humana, fixo qu'el so espardimientu y popularidá fora peramplia en tola nuestra tierra. Pa la construcción de los aros úsense llámines fines de madera a les que se-yos da forma circular con un moldu, tres dexales a remueyu n'agua caliente. La piel suel ser de corderu, curtío con procedimientos artesanales, anque tamién s'usó piel de cabra o de vaca. Les ruxideres fabricábenles los ferreros na forxa o simplemente usando retayos de lates de conserva, empareyándoles pa qu’entrechoquen. Ye bien habitual tamién la so presentación en forma d'estríes pa ganar en sonoridá. Ye tamién mui distintivo d'esti instrumentu la presencia d'un furacu nel aru, pel que s'introduz un deu p'ameyorar la suxeción, o un rebaxe pa sostener meyor la pandereta cola mano. Esti instrumentu tocábenlu mayoritariamente les muyeres, qu'usaben técniques distintes na percusión: cola palma de la mano, coles yemes de los deos, arrastrando los deos, col puñu o a cencielles moviendo acompasadamente l’instrumentu pa qu’entrechoquen les ruxideres.

El panderu

Per enriba los aros d’esti panderu

Pasa la media luna Y el sol enteru

---- Esta pandeira que toco

é da peleya d’ouvea, ayer berrama no monte y hoi tócache que rabea

----

A les moces de Llaviana hay que veles en la cama,

Y a les de La Pola Siero Bailando al son del panderu.

---- ¡ Ay por bailar quien lo baila,

Morena, toco el pandero! ¡ Ay que si no lo arrojara,

Rodara por este suelo! (E. M. Torner)

Según Marentes y Criado, el panderu toma'l so nome del llatín pandorium qu’a so vez procede del griegu pandouron. Conozse davezu como panderu, panderu, pandeiru, pandera o pandeira y consiste nun cuadru de madera, al que s'arrodia con delles vueltes d'una cuerda fecha de tripes retorcíes, que funcionen a manera de bordones, y finalmente recúbrense per dambes cares con una piel, normalmente de corderu, ternera, robecu o cabra. La madera más común ye de nozal, carbayu o de castañal, que forma un marcu interior ente los 30 y los 45 cm, siempre con forma cuadrada. La unión ente los distintos llargueros faise por simple apoyu y claváu, con caxa abierta y espiga, o n’inglete.

14

La parte interior de los llargueros suel vaciase pa menguar el pesu y ganar en resonancia. Como detalle ye habitual arredondiar les esquines del marcu de madera pa que’l roce nun ruempa la piel que lu recubre. La piel suel dir cosío nos llaterales con bramante o cuerda de tripa. Nel interior yera bien común dexar piedres pequeñes ensin aristes, arbeyos o garbanzos, pa ganar en sonoridá. En díes de fiesta solíen engalanase los panderos con cintes fruncíes pelos llaterales o con flores. Pa tocar, ponse en paralelu al cuerpu, faciendo pinza col pulgar y la palma d'una de les manes, y percutiendo colos deos que queden llibres d'esa mano y la palma de la otra. Tradicionalmente son les muyeres les encargaes de tocalu, al tiempu que canten distintes melodíes.

El pandoriu

Trátase d'un instrumentu coles mesmes característiques d'una pandereta, d'unos 25 cm de diámetru, con dos fileres de ruxideres agrupaes de cuatro en cuatro pares (dos enriba y dos embaxo), pero con un mangu, en llugar de furacu pa la suxeción. Pa tocar, xírase la muñeca de la mano que suxeta'l mangu hasta que golpia contra la otra mano, movimientu distintu al usáu na pandereta, onde ye la mano la que busca'l contactu col parche. Esti instrumentu utilízase nel pueblu d'Arenas, conceyu de Cabrales, p'acompañar el Corri Corri. Nun ta bien clara l'antigüedá d'esti instrumentu; mientres qu’hai autores qu’afirmen que ye perantiguu, otros sostienen que nun llega muncho más allá de la metá del sieglu pasáu.

El vanu Un vanu, según el diccionariu xeneral de la llingua asturiana, ye un “cedazu grande con fondu de cueru emplegáu p'aventar, llimpiar y separar los cereales y otros frutos pequeños de los sos pulgos y impureces”. Sicasí, la so forma redonda y los materiales que lu formen, guarden un gran paecíu con una pandereta, lo que fixo que s'usara como instrumentu de percusión a falta de los orixinales, faciendo que se describiera como instrumentu puramente dichu col nome de panderu o panderu redondu. El so usu, estendíu na vecina comunidá de Galicia onde se denominen pandeiros redondos, usaos tamién como peneireiros (peñeras, vanos), tuvo ensin dulda gran influencia nos conceyos límitrofes del occidente.

Familia del tambor: El tambor Manuel Durán García, nel so llibru El tambor asturianu, describe cómo yá los romanos usaben esti instrumentu llamáu symphonia pa caltener el ritmu na marcha, anque fueron los árabes quien lu espardieron per tola península como forma d'amedranar a los cristianos nes batalles. Nun ye de sorprender que'l términu actual provenga de la palabra árabe at-tambur, que provién del persa tabir. Hasta'l sieglu XVII los tambores solíen presentar unes dimensiones considerables y nun ye hasta'l sieglu XVIII cuando la infantería del exércitu decide adoptar un tamañu inferior. N'esti mesmu sieglu reglaméntase tamién la decoración de los tambores, pintando la caxa en color azul, que ye'l mesmu de la Casa Real, y los aros de color coloráu, el mesmu de la infantería, colores qu'entá persisten na nuestra tradición.

15

Nel sieglu XIX produzse la definitiva adaptación del tambor a dimensiones más manexables y tovía se caltienen tambores d'esi estilu propiedá de tamboriteros afamaos como Mariano Castro o de Machacón, ente otros. El tambor tradicional asturianu ta formáu por un cascu de madera en forma de cilindru, que fai les veces de caxa de resonancia, fabricáu en nocéu o castañal. Ye probable que los tambores más antiguos llograren el so cilindru directamente del tueru de los árboles, simplemente vaciando’l so interior. Sicasí, lo más habitual ye pegar tables d'unos 5 cm de llau formando un círculu o cilindru consistente, o bien doblando una tira delgada de madera dempués de remoyala n'agua caliente, pa qu'una vez ablandiada la fibra, pueda dáse-y la forma cilíndrica habitual. En cada estremu del cilindru encáxense los parches de piel de cabritu montaos sobre unos bastidores finos que caltienen les pieles firmes sobre'l cascu. A so vez, sobre estos bastidores asítiense los aros que presionen pa tensar la piel. Estos aros fabríquense tamién con maderes dures como la nozal, y nellos añádense una serie de furacos oblicuos per onde se pasa una cuerda que va consecutivamente del aru cimeru al inferior, formando asina un sistema de tensión eficaz. Una característica distintiva en munchos de los nuestros tambores ye l'usu de la cuerda sobrante pa facer una cadeneta que se xunta al otru estremu del tambor, formando a la vez un ornamientu y una práctica asa pal so tresporte. La afinación correcta del tambor consíguese con unos apretones de cueru asitiaos ente les cuerdes, qu’al baxar obliguen a los aros a xuntase y a la piel a tensase. Finalmente, sobre'l parche inferior, va una cuerda fina de tripa animal suxetada en dos estructures metáliques a cada llau de la caxa que cimbla y suena al tocar. El soníu del tambor consíguese al tocar sobre'l parche cimeru con dos palos que varien en

llargor, tamañu de la cabeza y madera según el gustu del instrumentista, pero quiciabes la

peculiaridá más significativa asturiana ye'l “toque al aru”, un adornu a manera d'efectu tímbricu

que consiste en percutir sobre la superficie del parche y l'aru al mesmu tiempu. El tambor ye

l'acompañamientu rítmicu más habitual p'acompañar a la gaita nel baille y nel suroccidente tamién

acompaña davezu a la xipla, de la que yá falemos nun apartáu anterior.

El redoblante Nel sieglu XIX y gracies al desarrollu de la revolución industrial y a l'apaición de les industries metalúrxiques, apaeció otru tipu de tambor más llixeru y con un sistema de tensión nuevu y más prácticu, conocíu popularmente como caxa o redoblante, términu ésti últimu que Manuel Durán atribúi a los propios de les bandes de cornetes y tambores. Munchos fueron los tamboriteros asturianos qu'adoptaron esti nuevu instrumentu, como Serafín, el redoblante de Quintes o Sabín el redoblante de Villaviciosa. Tamién s’estendió muncho’l so usu per tol occidente y sobre too pel oriente pa los tradicionales ramos, enrames y h.ogueras.

El tamboríl

Una variante mui peculiar del tambor ye'l conocíu como “tamboríl”, “tamburil” o “tamborín”. Ye bien común ente les muyeres nel oriente pal acompañamientu en cantares o ramos. Nesta zona, les muyeres pasen la correa pel costazu y el toque ye más simple que col tambor estándar.

El bombu N’Asturies, asóciase la so introducción a les bandes tradicionales representatives del occidente, como acompañamientu de la gaita y el clarinete. Martínez Zamora afirma qu'en dellos conceyos de la zona llegó inclusive a ocupar l'espaciu principal del tambor o de la caxa o redoblante. Trátase d'un tambor planu con un diámetru efectivu d'ente 60 y 90 cm, que foi menguando col tiempu, y un altor

16

d'unos 25-30 cm. Ta fechu de madera d'una manera bastante similar a la yá descrita pa los tambores. Suel tocase namás sobre un llau con una maza de madera que tien una cabeza cubierta con piel, terciopelu o un texíu similar. Si bien nunca algamó'l nivel melódicu o l’estatus d'instrumentista del tambor, sí hai de destacar qu'en tiempos recién, cola apaición de les bandes de gaites, yá algama un papel mui significativu dientro de la percusión tradicional.

Familia de les castañueles: Les castañueles Consisten nuna pareya de cachos de madera duro llabrada interiormente pa dar mayor resonancia y con forma más o menos arredondiada esteriormente. De normal, presenten na so parte cimera unes oreyes nes que se faen dos furacos pelos que se pasa un cachu de cuerda o una cinta pa que queden xuníes dambes pieces y a la vez pa sosteneles y faceles sonar. El soníu produzse cuando se aprieten con un golpe secu los deos contra la palma de la mano, o bien cuando se mueven les manos consiguiendo asina producir un redoble. El so usu foi mui habitual a la hora de baillar pa marcar pasos y vueltes, anque n'ocasiones tamién sirvió p'acompañar la música instrumental al igual qu'en Galicia o Lleón. Julio Sánchez- Andrade nel so artículu “Delles consideraciones sobre los toques de percusión na tradición musical asturiana”, citando a dellos autores, diz que la castañuela suel asonsañar los golpes del acompañamientu de la pandereta o del tambor y que la bona tocadora de castañueles intenta siempre igualar esi toque. Fernando de la Puente destaca la so gran relevancia nel baille d’Arriba, “onde ocupen un papel fundamental frente a otros bailles onde les castañueles pasen a tener un papel secundariu frente al pesu rítmicu qu'ostenten los membranófonos (...) que bastaríen pa sincronizar a los bailladores”. Esiste una gran variedá de castañueles en tola nuestra xeografía, delles tallaes ricamente, lo que les convierte en pieces de gran valor estéticu y etnográficu. En cada contorna solía haber dalgún artesanu que se dedicaba a fabricales y distribuyiles nos mercaos. La madera usao ye bien variao: boxe, zrezal, nozal o pláganu, y les formes y acabaos tamién. Tocante a la so apariencia suelen tener toes les partes siguientes:

• El corazón, la cavidá interior que dimensiona’l soníu. • La concha o panza, la parte esterior, de llinies curvaes. • Les oreyes, los estremos más esternos de la panza onde s'atopen los furacos antes mentaos. • La ponte, que xune'l corazón y les oreyes. • El llabiu, el reborde interior de la castañuela ente'l corazón y la concha. • El puntu, el resalte nel llabiu opuestu a les oreyes qu’impide que se zarren los llabios

dafechu, lo qu’impediría la producción del soníu.

Los pitos

Denomínense pitos aquelles castañueles que producen un soníu más agudu al cuntar con un corazón interior más pequeñu. Nomalmente trátase de castañueles de tamañu pequeñu, con mui poca distancia ente les oreyes, que nun dexa l'usu en más d'un deu, bien l'anular o'l pulgar lo que fai que camude'l toque. N'otres ocasiones pue tratase de castañueles de tamañu estándar pero con un corazón de dimensiones mui pequeñes que produz el mesmu soníu agudu, polo que tamién se denominen pitos igualmente.

Les tarrañueles Les tarrañueles, tamién conocíes como tarañuelas o terrañuolas, compónense de dos tablielles rectangulares, allargaes y fines de madera duro, normalmente boxe, anque tamién s'usaben otres maderes endurecíes depués de quemales llixeramente al fueu. Alternativamente, tamién

17

s'emplegaben cachos de lladriyu, cerámica, lloza de los platos, o costielles de vaca o caballu. Dambes pieces suelen ser iguales anque delles veces arredondiábense nos estremos, o variaben n'anchor pa facilitar el toque. N'ocasiones, pueden presentar una pequeñu güecu como nes castañueles, p'ampliar el soníu. Pa tocar, suxétase una de les tarrañueles ente l'índiz y el corazón apretando contra la palma pa que nun se mueva. La otra sostiénse ente los deos anular y el corazón, dexándola lo bastante suelta pa que choque contra la otra tarrañuela, xirando a un tiempu la moñeca y el coldu. Pueden tocase a una sola mano o coles dos manes al mesmu tiempu, esto ye, con un par en cada mano. Autores como Curt Sachs dicen que tanto les castañueles como les tarrañueles quiciabes s’estendieren a traviés del Mediterráneu colos fenicios, pero posiblemente dambos instrumentos sían más antiguos.

Instrumentos adaptaos La falta de recursos o d'artesanos capaces de construyir instrumentos al usu nun impidió enxamás que la música desapaiciera de les nuestres cases y pueblos. Namás na cocina podemos atopar cuyares, que pueden facer les veces de tarrañueles, botelles, calderos de porzolana, o lates d'aceite, podríen ser tambores improvisaos, por nun falar de los sartenes, morteros, esquiles, campanes, etc... Vamos ver agora dalgunos de los más comunes y más singulares:

Les cuyares o cuchares Feches de madera o de metal utilizábense como les tarrañueles p'acompañar melodíes o cantares. Les cuyares vienen usándose dende'l Paleolíticu y caltiénense delles pieces de l'antigua Grecia fabricaes d'oru, plata, bronce y güesu. L'usu de la cuyar como instrumentu apaez en toles cultures y les formes de producir música con elles son bien variaes. La más común ye sostener les cuyares espalda contra espalda. La parte d’atrás de les cabeces de les cuyares tienen de tar en contactu. Ponse el deu índiz xusto abaxo, onde terminen les cabeces de les cuyares, ente les dos partes llargues, y ponse el pulgar escontra fuera, ensin que se toquen les cabeces. Los demás deos suxeten les cuyares, asegurándose de sosteneles d'una forma cómoda y de tener un bon agarre. Tóquense al aire o golpeándoles contra la parte cimera del muslo o la rodiya.

Los palos Martínez Zamora clasifica estos instrumentos como acompañamientu rítmicu puramente dichu, principalmente en determinaes dances y palotios del suroccidente. Usáronse tradicionalmente nos pueblos del conceyu d’Ibias, como El Bao y Tormaleo; del conceyu de Cangas, como Bimeda, Rengos, L.larón y La Viliel.la; del conceyu de Degaña, como Trabáu y Rebol.llar y tamién al otru llau del cordal, na provincia de Lleón, como Perenzanes. Nestes dances cada danzante lleva dos palos, ún en cada mano, delles veces decoraos con cintes de colores, y bátenlos ente sí o colos de los otros danzantes mientres realicen les distintes figures y pasos de la danza. Caltiénense dances similares en toa Europa y munches d'elles tán bien documentadas dende'l sieglu XVI. Na vecina Portugal son famosos los Pauliteiros de Miranda, de tradición mui próxima a la nuestra. Autores como Marius Schneider afirmen qu'estes dances de palos tienen un orixe bien antiguu, y pueden ser restos de dances de guerra o de rituales de tiempos prehistóricos, cuando los palos y les espades yeren les armes utilizaes na guerra.

18

Los fierros Martínez Zamora clasifica esti instrumentu como acompañamientu rítmicu puramente dichu, asociáu cuasi siempre a la zanfoña. Los fierros son un instrumentu percutíu de metal, tradicionalmente construyíu polos ferreros, perteneciente al grupu de los idiófonos, onde’l soníu resultante ye frutu de la vibración del metal al golpiase con una baqueta. Consiste nuna barra o estructura cilíndrica d'aceru doblada en forma de triángulu, cola particularidá de qu'una de les sos esquines queda abierta. De normal, nun se sostién directamente l’instrumentu sinón que se suxeta con un cordel pa evitar matar el soníu.

La payel.la Al igual qu'el vanu, la payel.la ye un instrumentu de cocina qu'algamó una gran popularidá como instrumentu musical cotidianu, con un ciertu prestíu, siquiera na primer metá del sieglu XX. Trátase d'un sartén de fundición d'una sola pieza, col mangu llargu pa evitar les quemadures nel llar. Tócase percutiendo sobre ella con una llave grande antigua. Denomínase tixela na zona eonaviega, sartén na zona centru, y tamién con formes dialectales como cazu o quezu. Martínez Zamora describe’l so usu asina:

“Pa tocala, la muyer ponse a la izquierda de la panderetera. Anque delles veces quier dase razones de calidá de soníu a esti fechu, lo lóxico ye pensar que la so única razón ye evitar los posibles golpes producíos pol brazu derechu de la panderetera. El mangu del rabu asítiase sobre la rodiya derecha mientres que se suxeta l'otru estremu d'ésti suavemente colos deos de la manzorga. La otra mano suxeta la llave de fierro que golpia y esfrega’l sartén”. Esti mesmu autor añade tamién una observación interesante: “los mangos de sartén serraos que vemos en dellos grupos ye una aberración musical, frutu de la incapacidá pa reproducir la maestría del toque de les tañedores d'esti instrumentu, intentando sustituyila pol estrueldu que producen les estríes”.

La botella Les botelles llabraes, les más típiques les d'anís, percutíes con una llave o una cuyar emplegábense llargamente en Asturies como complementu rítmicu pa los cantares. Nun sirvía cualquier tipu de botella llabrada, namás les de "carambelos", en referencia a la forma cuadrada del llabráu. El so usu como instrumentu musical nun pue ser mui antiguu viendo que les primeres botelles d'esti tipu nun apaecieron hasta bien entráu'l sieglu XIX.

Les lates (aceite, pimentón) Non siempre ye fácil fabricar o mercar una pandereta o un panderu, sobre too n’époques d'escasez como fueron los periodos antes y dempués de la Guerra Civil, y por eso los oxetos cotidianos como les lates se convirtieron nun mediu económicu y bien prácticu d'acompañar los cantares y los bailles. La primer lata pa conservar alimentos y líquidos patentóla en 1810 por Peter Durand, un inventor inglés, pero nun entamó la so fabricación comercial hasta 1813 pa envasar alimentos pa l'Armada Británica. Suel tocase sentáu, poniéndola en posición vertical sobre les rodiyes. Tócase na so parte delantera (la más ancha) con toques asemeyaos a los de la pandereta o'l panderu, o a dos manes alternativamente.

19

Otros instrumentos: Los citaos enantes nun son los únicos instrumentos de la nuestra tradición. La gran inventiva de los

nuestros antepasaos dio llugar a una serie d’instrumentos que vinieron a sustituyir o a complementar a los yá descritos bien por falta de recursos o por simple entretenimientu. Martínez Zamora distingue entre:

• Xuguetes musicales, que xeneren una sola nota o soníu. • Instrumentos que nun xeneren, estrictamente falando, nin melodía nin ritmu. • Utensilios que s'utilicen delles veces como instrumentos. Yá incluyíos na sección d'acompañamientu

rítmicu yá que toos se utilicen con esti fin. • Instrumentos de construcción cenciella, que xeneren delles notes y polo tanto pueden producir

melodíes. Yá incluyíos na sección de instrumentos solistes yá que se pueden usar como talos. Veamos finalmente los dos primeros:

Los xuguetes musicales: Otra de les utilidaes de los instrumentos o oxetos sonoros tradicionales ye l'entretenimientu infantil. Eugenio Martínez Zamora, nel llibru de la esposición del grupu RAIGAÑU na Feria de Muestres de Xixón de la Caxa d'Aforros d'Asturies, editáu n'Uviéu en 1992, señala que “el xeneralizáu espardimientu d'un cientu de xuguetes musicales construyíos con elementos naturales esplícase non solamente dende un puntu de vista musical, sinón fundamentalmente dende la conocencia del contestu nel qu'apaecen. Munchos d'estos instrumentos fabríquense en primavera aprovechando les posibilidaes de la corteya de les cañes. El proceder yera bien senciellu: “córtase una caña, enúnciense unos esconxuros”, dase un golpe col mangu de la navaya y la corteya sal llimpiamente pa ser tresformada en bien pocos pasos nun instrumentu musical”. La corteya más que más s’usaba yera la de castañal”. De siguío vamos describir los más significativos na nuestra tradición:

Les xiblates Con esti nome arrexuntamos un grupu de flautes feches d'elementos vexetales que namás se pueden fabricar n’époques determinaes, y con vida útil tamién mui curtia. En primavera, cola xubida de la sabia, les cañes tienen la elasticidá y consistencia necesaries pa poder adaptales como flautes. Básicamente, constrúyense coles cañes de castañu, salgueru o ablanu, nes que se facíen los furacos deseyaos antes d'estrayer la corteza. Pa formar la embocadura introduzse nella un tacu de madera rebaxáu so parte cimera pa dexar pasar l'aire. Esti tipu d’instrumentos conozse con múltiples nomes, siendo los más habituales “xiblates”, “xiplos”, “xirpos”, “chifles”, “zamploñes” o “pipes”, ente otros. La maña del constructor permite introducir una serie de meyores que faen que la calidá del instrumentu ameyore notablemente. Delles veces pue añadise dalgún tipu de sonador: una llingüeta doble o simple, que pue formar parte del tubu o ser añadida. Delles veces la llingüeta simple consiste nun cachu de caña al que se-y separa una llámina; la llingüeta doble pue facese por separao o nel mesmu tubu, y faise rebaxando la parte más esterna de la corteya con una navaya. Si lo que queremos añadir ye una embocadura de flauta de picu, precisamos inxertar un cachu de la madera nel so interior, rebaxáu con un furacu pequeñu pel que pase l'aire. Finalmente, faise un corte na corteya pa qu’al soplar pela ranura llogremos producir soníos. Munchos autores describen tamién dos tipos de xiblates bien estendíos y peculiares. Les xiblates de maíz y la d'alcacer o avena. La primera faise na seronda, pa ello córtase un cachu de la caña ente dos nuedos, de manera que quede abierta n'ún de los estremos. Cerca del estremu zarráu faise un furacu pequeñu cola ayuda d'un fierru caliente, nel que se sopla pa producir el soníu. Si se quieren consiguir notes distintes, realícense nueves perforaciones a lo llargo del tubu y en llinia col furacu yá fechu. Les d'alcacer fabríquense de paya d'avena o otru cereal como'l centenu, la cebada, o'l trigu. Pa la fabricación, dáse-y un corte en bisel ente dos nuedos, separando una llámina que va facer de llingüeta simple. Si se quieren consiguir notes, añádense furacos a lo llargo de tubu.

20

La superstición popular facía que quien fabricara una d'estes flautes tuviera qu'enunciar dalgún tipu de versu o esconxuru pa que l’instrumentu funcionara correctamente. Constantino Cabal recoyó dalgunos d'estos esconxuros que se recitaben mientres s'ellaboraben:

Salivina, salivar salí chifla de salgar,

que allá volverás a entrar, pelos ríos de la tierra y les agües de la mar

Nel casu del castañu cambiaríase por: -Salivín, salivón

sali, caña de cepón... Xosé A. F. “Ambás” recoyó a la so güela Celestina estos otros:

Ulivín, ulivón unta'l culu con xabón, la barriga con arena,

Ai Pachina que me queima. También recoyó ún similar en Cubia, pero entamando con "Salivín, salivón...."

El vigulín de maíz Un subtipu de vigulín ye'l vigulín de maíz. Ésti componse de dos cañes de maíz, de les que se saquen unes cuerdes a partir de la so corteya. El procesu de fabricación ye bastante cenciellu: Córtase un cachu de caña de trés nuedos, dos d'ellos pueden coincidir colos estremos, dexando nel centru'l tramu nel que suel nacer la panoya. Nesta zona, que suel facer un furacu, fáense dos cortes llonxitudinales ente los nuedos, de forma que queden dos aristes llaterales. Tamién s’inxerta una caña fina de maíz a manera de cuña nos estremos d'estes aristes, pa que sobresalgan y se tense. Pal arcu, necesitamos otra caña de maíz recta con tres nuedos. L'espaciu ente'l primer y el segundu nuedu va facer les veces de mangu y nel furacu ente'l segundu y tercer nuedu hai que facer un corte llonxitudinal rematáu tamién con dos cañes en cada estremu pa tensar. Finalmente, fáense cuatro o cinco cortes llonxitudinales más pa formar una serie de tires fines que van producir el soníu al estregar sobre la otra caña. Pa que los cortes d'estes tires nun s'enllarguen y ruempan suel ponese unes vueltes de filo a la fin d'éstes, tanto na pieza que fai de violín como na que fai d'arcu. Pa tocar, gárrase una de les partes (si nun son iguales, la mayor) con una mano, suxetándola contra’l costáu y cola otra gárrase por un estremu l'arcu y coles sos cuerdes frótase’l violín. Eugenio M. Zamora apurre delles denominaciones pa esti instrumentu - xuguete: tarucu, violín, el maíz o vigulín. L'autor documenta la so presencia principalmente na zona noroccidental asturiana, anque tamién hai referencies en conceyos más centrales ya inclusive nel oriente como Uviéu, Tinéu, Colunga o Llanes.

Los cuernos y les bígares Tamién yera bien común na nuestra tierra facer instrumentos usando cuernos d'una vaca o de güe principalmente. Pa ello vacíase'l cuernu y córtase la punta, dende la que se sopla consiguiendo un únicu soníu roncu y fuerte que pue oyese a distancies llargues. El soníu xenérase pola vibración que producen los mesmos llabios del instrumentista, anque tamién se puen añidir biseles o llingüetes de caña.

21

Delles veces los cuernos pueden dir llabraos na so parte esterior con motivos tallaos o inclusive pintaos de colores distintos. Caltiense una referencia d’Estrabón (Xeografía, III, 3, 7) na que fala d'un cuernu propiu de los habitantes del noroeste de la península a principios de la nuestra dómina. En zones costeres, apaez otru instrumentu asemeyáu al cuernu n'usu y aprovechamientu, como son les caracoles o bígares. Pa faceles sonar sóplase dende l'estremu usando los llabios como doble llingüeta, produciendo un soníu que va resonar nel interior de la mesma. Tanto los cuernos como les caracoles nun se consideren habitualmente instrumentos musicales puramente dichos, yá que nun pueden crear una melodía.

Los berrones y les cornetes Esti instrumentu consiste nuna tira llarga de corteya cortao n'espiral que s'enrolla apegando les uniones cola mesma savia qu'actúa como cola. N'ocasiones añádese una pequeña embocadura fecha tamién de la mesma corteya. Esti ye un instrumentu-xuguete propiu de la primavera, cuando la corteya ye fácil de separar de la madera. Lo normal ye golpiar la corteya pa llograr que se separe, y con un cuchiellu facer un corte n'espiral de menor a mayor. Nel estremu final, el más anchu, a veces inxértase una caña pequena qu’impide que se desarme, anque los mesmos xugos de la corteya yá actúen como pegamentu. Dependiendo de la maña del instrumentista pue añidise una llingüeta o dexala tal cual. Tamién se-y pueden añidir furacos tonales pa poder realizar melodíes simples.

Instrumentos que nun xeneren melodía o ritmu La rana Trátase d'un instrumentu común a tolos

territorios onde crecen nozales y en toos ellos usen el so

frutu pa facer instrumentos d'usu infantil. Joaquín Díaz

describe perbién la so ellaboración: “Sobre una de les dos

metaes d'una cáscara de nuez, faise un corte na parte

más estrecha del óvalu, dexando ésti truncáu. Casi nel

estremu d'esi corte y na parte más ancha del óvalu fáense

dos furacos al traviés de los que se dan dos vueltes de

guita. En mediu esos dos filos introduzse un palu planu

pel mediu del que se retuerce la doble cuerda hasta que quede tirante. Al percutir con un deu sobre

la parte del palu que sobresal nel corte, l'otru estremu golpia nel cantu la cáscara. Utilizando varios

deos alternativamente puede consiguise un

repicotiar”.

La carraca Xose Lluis García Arias define carraca nel so Diccionariu Xeneral de la llingua Asturiana con distintes acepciones: “instrumentu pa facer ruiu en cuaresma, instrumentu pa tocar los neños el día de Xueves Santu, instrumentu de madera utilizáu en Selmana Santa o instrumentu musical de madera emplegáu pa facer fuxir les alimañes”. N’Asturies recibe nomes mui variaos: carraca,

22

ronquiella, rancol.la, rañueca, cantalarrana, matrácula o espantaburras, lo que nos da idea de dalgún de los sos usos. Les carraques tán formaes por una rueda dentada xunida a una exa que sirve de fixación. Alredor de la exa, xira una pieza de madera de la que sal una llingüeta, que suena al golpiar repetidamente los dientes de la rueda. El so usu ta íntimamente asociáu a la Selmana Santa, nes que xunto coles matraques reproducíen la truena qu’aportó cuando la muerte de Cristu na cruz, y que según la Biblia causó la muerte de munchos xudíos. Polo xeneral yera'l mesmu tañedor quien fabricaba la carraca de so, lo que derivó nuna gran cantidá de modelos distintos; anque la fabricación de carraques, yera una de les ocupaciones asignaes a los presos en delles cárceles españoles hasta los años cincuenta del s. XX. Dalgunes d'estes carraques presenten dientes bien angulosos, que producen soníos agudos y secos, mientres que les que tienen los dientes más arredondiaos producen soníos menos estridentes. Otres tienen dientes curvaos y namás suenen xirando nun mesmu sentíu. L'usu d'esti instrumentu nun se centra solo en Selmana Santa n’Asturies, sinón qu'apaecen en tou tipu d'actividaes que tuvieren acompañaes de ruiu, sobre too en fiestes y nes pandorgaes o pandorgues que se daben a aquellos que se casaben de segunda vez.

La matraca Consiste nuna tabla de madera sobre la que golpien ún o dellos mazos que van suxetos a ella per mediu d'una exa. Según Martínez Zamora, el so espardimientu centrábase básicamente nos conceyos más occidentales frente a la carraca de la que queden exemplos en tola nuestra xeografía. Dambes usábense fundamentalmente en Selmana Santa nel Oficiu de Tiniebles. Polo xeneral, consta d'un cuerpu de madera al que se xunten unos martiellos o mazos móviles de madera que lu golpien. Pue tener una asa, si ye de tamañu pequeñu, anque munches matraques puen llegar a tener un gran tamañu. En dellos puntos de la península son tan grandes que se guarden nos coros de la ilesia o nel campanariu como alternativa a les campanes. Tamién esisten modelos nos que se sustitúi'l mazu por una barra metálica doblada en forma de “o” suxeta a la base, a la que golpia cuando se xira la matraca. Tamién se conoz colos nomes de maltraca, maltrácula o martadela.

El riquerraque El "riquerraque" faise con dos mitaes de nueces vacíes nes que se mete un palu pequeñu, con una cuerda fina enroscada. Al tirar del cordón con fuerza, les nueces xiren a muncha velocidá, faciendo un ruíu característicu. La cuerda enroscase y desenroscase, hasta que pierde fuerza. L’usu principal ye l'entretenimientu de los neños, polo que munchos autores venlu más cerca del xuguete que de la música. Tamién esisten distintos modelos dependiendo del númberu de nueces, yá que se pue incluyir una nuez adicional en mediu, o una nuez más na parte inferior y ensin vaciar el so interior, pa que tenga más pesu y xire con más fuerza y velocidá.

23

Cantares

Ofrecióme tanto y cuanto, díxome que yera bona neña y el Nanu metiome un fuelle

como el d'una gaita vieya. ---

¿Non visti la felpeyona de guantes y mandillón?

"Tiru, liru liru, liru liru, liru, tiru, liru liru, liru lirulón".

Lleva más fleco en la saya que en la gaita Ramonzón.

"Tiru, liru liru, liru liru, liru, tiru, liru liru, liru lirulón".

Lleva más fleco en la saya que en la gaita Ramonzón.

"Tiru, liru liru, liru liru, liru, tiru, liru liru, liru lirulón".

--- Ya sabes que tengo gaita, ya sabes que soy gaiteru,

ya sabes que como yo non hay quien toque el punteru.

El fuelle de la mió gaita ye de terciopelu negro;

el flecu de seda, merquélu en Oviedo. ¡Cómo se ximielga col vientu que sopla! Cómo la mió gaita, xuro nun hay otra.

--- Pedru Meleiru (bis)

na Villa de Grau, llevaba la gaita

colgada d'un palu. Agora non, mió neñu, agora non, agora non, mió neñu, agora non.

--- Bailando, bailando

y al son del tambor, aquel quirosanu un pie me trió.

Con el quirosanu non güelvo bailar; baila de madreñes,

me puede triar. ---

Yo quiero bailar con Pachu, Pinín, redobla el tambor,

que está munchu más lixeru y ximielgase mejor.

--- Ahora sale a bailar

un amigo que yo tengo y por eso voy a dar y por eso voy a dar

un golpe más al pandero. ---

Este pandero que toco, éste que tengo en la mano,

es de la mi cuñadita, de la mujer de mi hermano.

Este pandero que toco, éste que tengo en la mano.

--- Este pandero que toco (bis) tiene lengua y sabe hablar;

sólo le faltan los ojos para ayudarme a llorar.

--- Este pandero que toco,

en el medio tiene un ramo, con un letrero que dice:

¡Vivan los que estan bailando!

Este pandero está roto, ¿con qué lo remendaremos?

Con la lengua de los hombres, que son unos platiqueros.

--- Ahora que tú lo bailas,

yo te tocaré el pandero, pero si otro me lo manda,

mi vida del alma, yo le diré que no quiero.

--- Por encima los aros

D’este pandero Pasa la media luna

Y el sol entero ----

Esta pandeira que toco É da peleya d’ouvea,

Ayer berrama un monte Y hoy tócache que rabea

---- A les moces de Laviana

Hay que velas en la cama, Y a las de Pola de Siero

Bailando al son del pandero. ----

¡ ay por bailar quien lo baila, Morena, toco el pandero! ¡ Ay que si no lo arrojara,

Rodara por este suelo! ----

Este pandeiru que toco Los aros son de madera,

Las mocinas que lo bailan son del pueblo de Cibea

--- Este pandeiru que tocu Lus arus son de zreizal,

Ya lus mozus que lu tocan

24

Son del pueblu de Mual ---

Este pandeiro que toco Los aros son de xardón

Y esos dos que los bailan Son del pueblo de Larón

--- Este pandero que toco los aros son de sabugo, las mocina de lo bailan, son del pueblo de Jalón

--- Este pandeiru que tocu Tien lus arengus d’oliva, Ya la moza que lu toca

Nacéu de L.lagu p’arriba ---

Este pandeiru que toco Guitarras tiene tres.

¡ Viva el pueblo de Piedrafita, Y también el de Xedré!

--- Este pandero que toco Es de pellejo de corzo

Tocándolo en pelliceira Resonaba en Arandoxo.

--- Este pandero que toco

Me costó catorce riales; Con cintas y cascabeles, Cuatro pesetas, cabales.

--- Avivái las castañuelas,

Niñas del baile primero; Avivái las castañuelas

Que yo avivaré el pandeiro.

--- Toca las castañuelas

Ensin galbana, La que tocal el pandeiru

Todo lo paga. ---

Salivera, salivar Sali chifla, de salgar

Con salú y sin quebrantar; Nunca volverás a entrar.

--- Sali, Sali, xiblatín,

De corteza y maderín ---

Toca, zamploña, Que vamos pa roma;

Tu comerán pan Y yo borona, Si tocas bien

Pa con Dios irás, Y si tocas mal

En Infiernu caerás: Toca, toca, tocarás

--- toca, toca, pipa neuva,

mientras vou a Villanueva por un poco de maíz,

para ti, para mí, para el rey que viene ahí.

--- Toca, pandereta, toca,

que te tengo reventare; cuando mi amante bailaba,

morenita mía, non quesiste retumbare.

25

Biografía y Webgrafía: Bibliografía… para saber más:

AGRUPACIÓN DE ETNOGRAFÍA Y FOLCLOR REIJA. Instrumentos musicales na tradición asturiana. Alcordanza. 2006

ÁLVAREZ ACERO, Teresa. Los instrumentos tradicionales en Asturias- Material didáctico para Educación Primaria y Secundaria. Universidad de Oviedo. 2006.

CUADRIELLO SÁNCHEZ, Florentina. Instrumentos musicales en el arte asturiano hasta 1800. Conceyu de Xixón. 2002.

DE LA PUENTE HEVIA, Fernando M. El Bail.le d’Arriba. Autoedición.2000.

DURAN GARCÍA, Manuel. Tambor Asturiano "Usos, rudimentos y patrones" Ed. Ámbitu. 2011.

GARCÍA DE LA CUESTA, Daniel. Harpa y la so presencia n’Asturies. Asociación Cultural Esbilla, 2004.

GARCÍA DE LA CUESTA, Daniel. Les gaites. Asociación Cultural Esbilla, 2012.

GARCÍA DE LA CUESTA, Daniel. La bandurria y el rabel. Asociación Cultural Esbilla, 2005.

GONZÁLEZ ARIAS, Ismael María. Cronoloxía de la música asturiana. Ed. Ámbitu. 2005.

LLANEZA, Ángel / GARCÍA DE LA CUESTA, Daniel. Instrumentos cordófonos nel folclore. Asturama VTP Editorial. 2002

LLANEZA, Ángel / GARCÍA DE LA CUESTA, Daniel. Instrumentos airófonos nel folclore asturianu. Asturama VTP. 2002

LLANEZA, Ángel / GARCÍA DE LA CUESTA, Daniel. La percusión nel folclore asturianu. Asturama VTP. 2002

MARTÍNEZ TORNER, Eduardo. Cancionero musical de la lírica popular asturiana. Maxtor Libreria Editorial. 2005.

MARTÍNEZ ZAMORA, Eugenio. Los instrumentos musicales tradicionales. Enciclopedia de la Asturias Popular, volumen 2 Llugones: El periódico- La Voz de Asturias. 1994 .

SÁNCHEZ-ANDRADE FERNÁNDEZ, Julio. La percusión en la música tradicional asturiana. Conceyu de Xixón. 2007

SÁNCHEZ-ANDRADE FERNÁNDEZ, Julio. Algunas consideraciones sobre los toques de percusión en la tradición música asturiana. Revista de Folklore 298. 2005

VARIOS. La gaita asturiana, Método para su aprendizaje. Servicio de publicaciones del P. de Asturies. 1991.

VARIOS. La gaita asturiana, xornaes d’estudiu. Serie Etnográfica 4. Archivu de la Música Tradicional Muséu del Pueblu d’Asturies. Consejería de Cultura, Comunicación Social y Turismo del Principado de Asturias. 2005

26

Webgrafía… para saber más:

Autor Dirección Web Los Instrumentos tradicionales Asturianos. Sección de la web Emigrastur, dependiente de la Dirección General

de Interior y Emigración

http://www.emigrastur.com/musica/instrumentos.htm

Instrumentos musicales na tradición asturiana. Guía de la A.E.F Reija.

www.reija.as/reija/downloads/REIJA-INSTRUMENTOS.pdf

La Gaita Asturiana. Xornaes d’Estudiu. http://s3.redmeda.com/biblioteca/gaita_2005.pdf

Instrumentos musicales de Asturias. Documental de la Productora de Programas del Principado.

https://www.youtube.com/watch?v=c2E-YuPTmRw

Vezos y Costumes. Tienda de instrumentos tradicionales

http://www.vezosycostumes.com/instruas.htm

Presentación interactiva sobre los instrumentos tradicionales asturianos

https://prezi.com/yh4rekflouje/instrumentos-tradicionales-asturianos/

Web de la Consejería de cultura de Galicia sobre sus instrumentos tradicionales, muchos de ellos comunes

en Asturias.

http://www.consellodacultura.gal/asg/instrumentos/

Presentación interactiva sobre la clasificación de los instrumentos tradicionales asturianos

https://prezi.com/yh4rekflouje/instrumentos-tradicionales-asturianos/

Trasgu y los instrumentos tradicionales asturianos http://andariegamusical.wix.com/instrumentos-asturianos

Web del grupo folclórico Azabache http://www.azabachefolclore.es/Azabache1_archivos/instrumentos

musicales.htm

Instrumentos tradicionales de la Península Ibérica http://www.tamborileros.com/tradiberia/