Ourense fronte ao cambio climático
-
Upload
ourenseencomun -
Category
Documents
-
view
213 -
download
1
description
Transcript of Ourense fronte ao cambio climático
Moción do Grupo Municipal Ourense en
Común a presentar no pleno ordinario do mes
de decembro (04/12/2015).
Ourense fronte ao cambio climático
Moción presentada para a aprobación dunha batería de medidas encamiñadas a sumar o Concello
de Ourense á loita global contra o cambio climático.
EXPOSICIÓN DE MOTIVOS:
PREÁMBULO, DIAGNOSE E XUSTIFICACIÓN
A UE propuxo en 2009 a redución das emisións de gases de efecto invernadoiro entre o 25 e o 40
% para 2020 e entre o 80 e o 95 % para 2050, sobre a base de 1990. O último informe sobre Cambio
Climático (AR5) do Panel Intergubernamental da organización das Nacións Unidas (IPCC), publicado en
2014, propón que estas emisións globais de gases de efecto invernadoiro deben alcanzar o seu punto
máximo en 2015, sendo este ano o punto de non retorno. Este mesmo informe apunta á necesidade de
reducir as emisións a unha taxa anual de arredor do 6 % coa fin de non perder a derradeira posibilidade para
manter o aumento da temperatura mundial media por debaixo de 2 °C (o Acordo de Copenhague recollía
que se deberían facer esforzos para manter a suba por debaixo de 1,5 ºC). De non acadar este obxectivo
tanto a ONU como a Unión Europea concordan nunha inmediata aceleración de consecuencias derivadas
do cambio climático.
A actividade diaria en cidades como Ourense é responsable do 70-80 % das emisións de gases de
efecto invernadoiro. As vagas de calor, inundacións, secas e tempestades, con perdas de colleitas, danos e
perda de vidas humanas, serán cada vez máis frecuentes se non freamos este proceso nin adaptamos a
estes cambios os nosos concellos.
EPÍLOGO: Think Global, Act Local
Neste mes de decembro apróbase na Conferencia de París (COP 21/CMP 11), baixo o marco de
Nacións Unidas sobre o Cambio Climático, un acordo internacional co obxectivo final de avanzar no enorme
reto de afrontar Cambio Climático acelerado pola acción humana.
As negociacións avanzarán nas seguintes áreas:
- Compromisos e plans adaptados á realidade de cada país para o período posterior ao ano
2020, recompilados nas contribucións previstas e determinadas a nivel estatal.
- Transparencia internacional e rendición de contas das accións de cada un dos países
participantes.
- Apoio tecnolóxico para países en desenvolvemento para promover un futuro baseado en
fontes de enerxía limpa e resiliencia climática.
- Traxectoria de emisións e dirección a longo prazo a escala global.
O Concello de Ourense ten unhas competencias limitadas e a súa situación xeográfica fica lonxe
do cumio de París. Malia ao anterior debemos ser conscientes que as nosas accións teñen un impacto
ambiental que non distingue de fronteiras nin de administracións menores ou maiores. Compre lembrar unha
vez máis que Ourense é, segundo datos do Observatorio de Sostibilidade de España, a terceira capital de
provincia máis motorizada só por detrás das insulares Palma de Mallorca e Santa Cruz de Tenerife. Só o
reducido da nosa poboación permite que a calidade do aire que respiramos non supoña un problema de
saúde pública municipal en determinadas épocas do ano.
Porque cada pequeno xesto conta o Concello de Ourense non pode quedarse ao marxe dun dos
maiores retos aos que se enfronta a humanidade. Debemos avanzar con medidas que fagan máis habitable
o noso municipio para as persoas que nel vivimos pero tamén para quen nos sucederán.
É por todo o anterior que o grupo municipal Ourense en Común presenta ao Pleno para o seu
debate e aprobación os seguintes
ACORDOS:
1. Cuantificación e inventario de emisións nas dependencias e empresas municipais, así como
nos centros de ensino nos que é responsable do seu mantemento.
2. Fixación dun obxectivos de redución como os propostos polas institucións europeas.
Adoptando plans e medidas necesarias para conseguir a redución fixada de emisións, como
plans de produción e autoconsumo con enerxías renovables, o aforro e a eficiencia enerxética
coas tecnoloxías dispoñibles e a rehabilitación enerxética dos edificios.
3. Contratación do 100% do subministro de electricidade de orixe renovable para as
dependencias municipais.
4. Introdución de cláusulas de compromiso social e sustentabilidade en futuros pregos de
contratación: transportes, residuos, etc.
5. Pór en marcha accións fiscais de bonificación para estimular á poboación local e empresas
para que asuman obxectivos e medidas similares.
6. Establecemento de campañas anuais de comunicación, formación e educación cidadá sobre
o Cambio Climático e as súas causas, consecuencias e alternativas.
7. Compromiso da actual corporación para implementar, previa proposta da Mesa de Mobilidade
Municipal:
a. Transporte Público Municipal limpo, eficiente e adaptado ás necesidades das veciñas
de Ourense.
b. Deseño e execución de carril bici cun percorrido completo que comunique os
principais nodos de atracción da cidade.
c. Progresiva pacificación do tráfico rodado e expulsión do transporte motorizado do
centro urbán.
8. Compromiso da actual corporación para garantir no Plan Xeral de Ordenación Municipal o
maior número de espazos verdes e zonas arboradas.
9. Compromiso da actual corporación a introdución na planificación urbanística a adaptación a
fenómenos climáticos extremos e avanzar no desenvolvemento de enerxías renovables non
contaminantes, nomeadamente a xeotermia.
E para que conste aos efectos oportunos Martiño Xosé Vázquez Mato, en calidade de concelleiro e
voceiro do grupo municipal de Ourense en Común, asina o presente documento en Ourense a 30/11/2015
Asdo. Martiño Xosé Vázquez Mato