Monitorizar as actividades do Concello de Ourense
-
Upload
ourenseencomun -
Category
Documents
-
view
226 -
download
4
description
Transcript of Monitorizar as actividades do Concello de Ourense
Moción do Grupo Municipal Ourense en
Común a presentar no pleno ordinario do mes
de novembro (06/11/2015).
Monitorizar as actividades do Concello de Ourense
Moción presentada para o estudo e avaliación das actividades sufragadas ou patrocinadas en todo
ou en parte, en base aos orzamentos municipais.
EXPOSICIÓN DE MOTIVOS:
“Non podes xestionar o que non podes medir” - Edwards Deming
DIAGNOSE E XUSTIFICACIÓN
Son moitos os estudos levados a cabo sobre pobreza e exclusión social que demostran que son as
capas sociais menos desfavorecidas as que máis se benefician dos recursos públicos. Por citar algúns
traballos podemos tomar como referencia o Estudo da Universidade de Glasgow, “Poverty and Social
Exclusión” dos investigadores Hasting A. e Matthew P., que demostraron en tres rexións diferentes do planeta
o feito da dobre exclusión nos perfís sociais máis baixos no acceso aos servizos públicos. Así é que todos
estes traballos coinciden na necesidade de levar a cabo un control efectivo mediante prácticas estatísticas
que permitan avaliacións periódicas do uso e goce dos servizos públicos.
Que demanda a sociedade?, en que barrios?, en que rangos de idade?, axuda no contexto
laboral?, ten en conta o xénero?, que criterios de ingresos ano/unidade familiar se valoran?, cal é o horario
preferente?, etc. Son preguntas sen resposta na actualidade para a maioría das actividades sufragadas en
todo ou parte polo Concello de Ourense sen que podamos deste modo mellorar os servizos prestados e
adaptalos a unha realidade social cambiante.
Só coa recollida destes datos e o seu procesamento mediante procedementos de enfoque entre
todo os axentes implicados poderemos facer unha análise das necesidades reais. Sen esta información a
administración local non será quen de tomar nunca medidas correctoras e de adecuación para un mellor e
máis axeitado aproveitamento das persoas beneficiarias.
EPÍLOGO: Monitorizar as actividades do Concello de Ourense
Recentemente véñense de presentar as actividades para asociacións veciñais promovidas dende
diferentes concellarías municipais. Algunhas destas actividades están orientadas a colectivos específicos
aínda cando carecemos de calquera dato estatístico que oriente a súa oferta (idade, renda, nivel cultural,
procedencia, xénero, necesidades formativas...).
É polo anterior que dende Ourense en Común demandamos que para próximas convocatorias se
deseñe un programa estatístico de avaliación e seguimento destas actividades. Estes datos, se ben deberán
ter un carácter anónimo e en cumprimento da Lei de Protección de Datos de Carácter Persoal (Lei 15/1999),
poderán facilitarnos grande cantidade de información coa que mellorar o servizo e adaptación as necesidades
reais e específicas das veciñas e veciños do noso Concello. Asemade, apelando ao compromiso
programático desta organización pola transparencia, e a propósito da recente inclusión desta institución na
Rede de Concellos pola Transparencia e a Participación Cidadá, demandamos que sexan públicas todas as
bases de contratación destes servizos, criterios de selección, importe da súa contratación, número de
persoas beneficiadas pola actividade, retorno social, etc.
É por todo o anterior que o grupo municipal Ourense en Común presenta ao Pleno para o seu
debate e aprobación os seguintes
ACORDOS:
1. Incluír en todas as actividades en curso, subvencionadas en todo ou parte polo Concello de
Ourense, un cuestionario-enquisa de avaliación deseñado polos servizos sociais municipais que
permita a recollida de datos estatísticos referidos ao perfil e necesidades dos seus usuarios.
2. Todas as convocatorias futuras de actividades subvencionadas en todo ou parte polo Concello
de Ourense deberán contar cun programa estatístico de avaliación e seguimento.
3. Unha vez acadado o apartado 2 as bases de contratación de ditas convocatorias deseñaranse
sempre en base a estas necesidades.
E para que conste aos efectos oportunos Martiño Xosé Vázquez Mato con D.I.
en calidade de concelleiro e voceiro do grupo municipal de Ourense en Común, asina o presente
documento en Ourense a 30/10/2015
Asdo. Martiño Xosé Vázquez Mato